旅程總結

最終, 今篇就係我為今年嘅意大利旅程所寫遊記嘅終結篇。

已經好耐冇試過一次過去咁長時間嘅旅行 (三個星期對打工仔嘅我來講好長)。 回想起以前讀書時, 都試過去好長時間嘅旅行, 有一次去左兩個月, 另一次都去左一個月。但唔知何解, 今趟好似去左好耐咁, 耐到覺得自己好似喺意大利磨爛蓆。

其實我覺得今次太貪心喇, 諗住踩太多地方; 精神上係充滿活力幹勁, 但實質上, 精力就因為不斷轉地方, 拖行李, 趕火車而攪到個人好疲倦。

有D野好想講, 但怕開罪旅伴, 所以 "心事" 一直埋藏在心裡。因為大家都係讀緊意大利文, 而佢亦好鍾意意大利, 所以同佢一齊去意大利旅行, 諗住大家好有共鳴嘛。我之前未同過佢去旅行, 又唔知對方生活習慣, 所以起初有少許憂慮, 但只係少許啫, 去得旅行, 都預左要互相遷就, 我最驚人地話我瞓覺有鼻鼾, 哈哈!!! 

旅程中發現, 生活習慣方面, 大家完全冇問題, 反而有另一些事情......諗左好耐好冇講, 不過都係收埋把口算喇.....

好多朋友問我.....意大利咁多好野食, 返來後肥左幾多磅呀??  答案係: 瘦左3磅!   呢個係因為旅程中根本冇食特別野, 多數時候只係吃 pizzas, 間中食下意粉, 好多當地美食, 例如佛羅倫斯嘅牛扒, 就冇食到, 極度遺憾。最高興係差不多每日一個 gelato (意大利雪糕), 聊解寂寞......

個人最鐘意嘅意大利地方, 仍然係都靈。唔知同因為呢個地方係祖雲達斯嘅所在地有冇關系, 不過呢個地方嘅人真係普遍都極之友善, 呢個係客觀原因令我好鐘意呢個城市。其次係呢個地方好乾淨, 好整齊, 安全, 同埋好優雅, 我都不止一次提過, 我覺得呢個城市好優雅, 就好似一個淑女一樣。

至於米蘭, 因為我對買名牌貨興趣不大, 所以感覺不大。最印象深刻, 係非常壯觀美麗嘅米蘭大教堂。至於達文西嘅名畫 "最後的晚餐", 暫未有機會看到。而下次如果再有機會路經米蘭的話, 希望可以到Monza (米蘭附近的一個城市)一遊, 其一因為有一位相識的意大利朋友在此居住, 今次未有機會相認, 希望將來見到啦; 其二係因為呢個係意大利著名嘅Formula One比賽場地, 而呢個地方仲有一個好大好靚嘅超大公園。

另在米蘭有件攪笑事。話說在一個好熱鬧多人嘅地鐵站出口, 我見到一個意大利男士, 佢條頸 (右邊頸)有三個好大隻嘅中文字紋身, 我順口就讀 "馬西....", 都未讀到第三個字 "莫"時, 呢位男士擰轉頭, 微微向著我笑....原來佢識聽廣東話??!!  咁噪咁多人行來行去, 佢都聽到人叫佢個名喎 (我讀得好細聲咋)!!  同埋, 佢知我講緊佢個名嘅廣東話!!!  攪到我只好尷尬儍笑....

Parma & Modena ~ 對柏爾馬呢個城市好欣賞; 再Modena嘅七彩屋都非常美麗。

熱拿亞 ~ 當日去埋呢個地方, 係諗住當休息地。估唔到呢個城市好有美國南部風情, 好 "椰林樹影", 又因為係海港城市, 令我覺得好似在香港。 熱拿亞應該係少數靠海嘅意大利大城市, 同都靈只相差兩小時火車車程, 但兩個城市, 兩種完全唔同嘅風格與韻味。如果講感覺, 我都好鐘意熱拿亞, 因為自已都住慣見到海嘅地方, 有親切感, 熱拿亞個海濱公園實在令我極為難忘, 太正。想象下, 住喺熱拿亞的話, 食飽飯冇野做, 行下海邊....感覺超爽!!!     但係呢個地方嘅人我就唔多喜歡, 因為佢地好多都頗惡死!!!  另外就係呢個地方好噪, 全個城市周圍都係摩托車, 好噪, 噪鬼死人, 空氣中又成日聞到一陣臭嘅氣油味。

五鄉地 (Cinque Terre) ~ 一定要再去, 可以去好多次都唔會厭嘅世外桃源.... 最正係海 +山 + 寧靜。

佛羅倫斯呢個城市太噪, 車多人多, 太旅遊太商業化, 我麻麻地鐘意。 但百花大教堂真係好靚, 仲有米高安捷羅廣場上遠眺佛羅倫斯市嘅美景。

Pisa ~ 除左個斜塔之外, 冇乜特別....將來應該唔會有需要再去 (除非有好特別原因)。

錫耶納 (Siena) ~ 一個字 ~ WONDERFUL!!  不能錯過的城市。

羅馬 ~ 每次去意大利都經過 (無論我想唔想再去都好)。永恆的城市 (The eternal city), 全市每個角落都係歷史遺址, 永遠都好似未去晒佢嘅景點。整日都係人車爭路, 熱鬧處處。對羅馬又愛又恨 ~ 愛欣賞佢嘅歷史文明建築, 恨呢個地方嘅人嘅差劣服務態度。 最深刻印象係: 在 Via Condotti (Condotti街)那間 Gucci店裡那個超級無敵靚仔護衛.... (唔好意思, 好膚淺, 最終都要講講男人, 無法啦, 異性相吸嘛....), 在意大利, 雖然見過唔少型男, 但呢個係 so far令我印象最最最深的 (足球員另計)。哈哈。感謝我細佬老婆叫我幫佢買 Gucci袋, 令我有緣見下其中一位絕世靚仔之一。

以後唔會再幫人 (任何人)買手袋銀包之類.... 搵著我來攪, 搵個唔識貨嘅人 (在下), 入去買手袋, 買完後返HK, 發現買錯野....差D要自已 "kan"埋個袋!!!

講下第二D野啦.....

今次旅行帶喼, 費是用背囊, 係因為上年整親條腰, 唔想舊患復發。但係下次再去意大利的話, 一定做番背囊友好過。拖喼在意大利自由行, 真係只會玩死自已。嗰D火車站, 十居其九冇電梯; 就算有, 99.99%係貼著張爛鬼紙, 話 "out of order", 真係好不知所謂!!!  有乜理由成日壞??  有乜理由周圍都係咁?  頂佢地唔順!!! 

仲有就係, 個喼可以報銷.... 攪到爛晒......好彩旅行保險可以 claim番一半錢.....亦好彩我個喼係cheap野....

希望有朝一日, 可以留在意大利一年半載, 揾間學校正正經經讀書, 學好意大利文, 因為發覺自已嘅程度實在太yap!  見到人時講到口窒窒, 又唔夠生字表達意思 (文法更加冇晒!!); 最弱一環必定係聆聽, 聽唔倒D意大利人講乜鬼, 因為佢地講野速度好快, 好似急口令咁。真係要練好意大利文先得。

唔知幾時會再去意大利呢?  依家經濟情況咁差, 加上有裁員可能, 所以暫時儲多些錢較為安全, 而近來更加加入左補習行列, 目的都係想有多個錢防身, 若果時間金錢許可, 下年或者後年再來個意大利之旅就正喇....希望PALLA到時已經回歸祖記, 可以再在奧林匹克球場睇佢同其他球員作賽。 熱拿亞呢個城市靚就好靚喇, 但嗰度嘅人好鬼惡, 同都靈人差太遠囉。

下次再去意大利的話, 最想可以去南部, 之不過如果一個人去的話, 全世界人都叫本人唔得一個女子去南部。我相信大家為本人人身安全着想, 所以希望下年有朋友一齊同我挑戰意大利北與南!!!  工程十分偉大浩蕩!!!   哈哈哈!!! 

讀萬卷書不如行萬里路, 我要向目的與夢想進發!!!! 

穿梭意大利2008 ~ 完結 ~~ 意大利, 我們後會有期!!!